Heilbrigðisráðuneytið áformar að gera breytingar á lögum um sjúklingatryggingu nr. 111/2000. Breytingar verða byggðar á vinnu starfshóps sem heilbrigðisráðherra skipaði í byrjun þessa árs um heildarendurskoðun laganna og hefur m.a. það verkefni að taka til skoðunar hvort rétt sé að breyta viðmiðum um hámarksbætur, hvort rétt sé að sjúklingatrygging bæti aukaverkanir vegna lyfja, réttar til bóta vegna andláts barns, málsmeðferð Sjúkratrygginga, heimildir til vinnslu persónuupplýsinga o.fl. Í áformunum kemur m.a. fram að markmið endurskoðunar laganna sé að einfalda sjúklingum að sækja bætur vegna tjóns af völdum heilbrigðisþjónustu og auka tryggingavernd þeirra. Að öðru leyti vísast til umfjöllunar í áformunum.