Í lok júní 2022 skipaði heilbrigðisráðherra verkefnahóp sem hafði það hlutverk að vinna að drögum að aðgerðaáætlun í samræmi við lýðheilsustefnu til 2030, sem hvetji fólk til að huga að eigin heilsu. Verkefnahópurinn kallaði fjölmarga aðila sem sinna lýðheilsustarfi á sinn fund og fékk frá þeim kynningar á ýmsum verkefnum sem hafa áhrif á lýðheilsu með einum eða öðrum hætti. Helstu niðurstöður hópsins voru kynntar á heilbrigðisþingi sem tileinkað var lýðheilsu, með sérstakri áherslu á heilsulæsi, í nóvember 2022. Heilsulæsi er mikilvægur áhrifaþáttur góðrar heilsu, en heilsulæsi felur í stuttu máli í sér hæfni fólks til að afla sér upplýsinga, skilja þær og nýta á þann hátt sem stuðlar að og viðheldur góðri heilsu. Alþjóðaheilbrigðismálastofnunin skilgreinir hugtakið á þann hátt að heilsulæsi geri fólki kleift að taka jákvæðar ákvarðanir. Það feli í sér ákveðið stig þekkingar og persónulegar færni til að grípa til aðgerða til að bæta heilsu einstaklinga og samfélagshópa með því að breyta persónulegum lifnaðarháttum og lífsskilyrðum. Aðgerðaáætlun þessi byggir á vinnu þessa verkefnahóps, þeirra tillagna sem fram komu í vinnuhópum á heilbrigðisþingi og stefnumótunarvinnu ráðuneytisins, þ.e. samþykktum stefnum og aðgerðaáætlunum er varða heilsueflingu og forvarnir t.a.m. heilsuefling aldraðra, krabbameinsáætlun, geðheilbrigðisstefna og stafræn heilbrigðisþjónusta o.fl. Í aðgerðaáætlunum um framkvæmd lýðheilsustefnu til fimm ára í senn verða lagðar fram aðgerðir og aðgerðaáætlanir einstakra málaflokka, sem forgangsraðað verður hverju sinni.