Með frumvarpinu er útgáfa sveinsbréfa færð frá háskóla-, iðnaðar- og nýsköpunarráðuneyti til sýslumanna en verkefnið fellur vel að þeirri þjónustu sem sýslumenn veita í héraði.

Lög um handiðnað hafa að geyma heimild fyrir ráðherra til að fela öðrum útgáfu sveinsbréfa að fullnægðum skilyrðum laga en hafa ekki að geyma sérstaka grein um efni reglugerðar. Er því lagt til að lögfest verði ákvæði sem fer núorðið í flest frumvörp sem snúa að framkvæmd verkefna sýslumanna. Reikna má með að rafrænum umsóknum og afgreiðslum fari fjölgandi næstu árin og því er nauðsynlegt að lögfesta heimild til að fela einum sýslumanni framkvæmd verkefnanna fyrir landið allt.

Samhliða þeirri breytingu á lögum um handiðnað sem að ofan greinir er lagt til að 5. töluliður 15. gr. laga um handiðnað falli niður, en hann felur í sér sektarheimild. Umrætt ákvæði fellur að réttu lagi undir málefni framhaldsskólalaga og hefur seinni hluti þess reynst fámennum greinum og fámennum svæðum erfiður í framkvæmd.