Í kjölfar flutnings málaflokksins mannréttindi frá dómsmálaráðuneyti til forsætisráðuneytis ákvað forsætisráðherra að unnin yrði grænbók um mannréttindi með sérstakri áherslu á mannréttindaeftirlit. Nú liggja fyrir drög hennar, en grænbók er greining á tilteknu viðfangsefni sem stjórnvöld hafa ákveðið að skoða nánar, ýmist sem undanfari stefnumótunar og/eða frumvarpsgerðar.

Grænbókin fjallar um stöðu og þróun mannréttinda á Íslandi og gefur yfirlit yfir lykilviðfangsefni framundan og helstu leiðir eða áherslur við úrlausn þeirra.

Markmið grænbókar um mannréttindi er að hvetja til umræðu um stöðumat, viðfangsefni og framtíðarsýn á sviði mannréttinda ásamt áherslum og valkostum. Mikilvægt er að stöðumatið sé sem réttast þar sem það mun liggja til grundvallar stefnumótunar í málaflokknum. Því er vakin athygli á 5. kafla þar sem settar eru fram spurningar sem aðilar eru beðnir að hafa í huga við skrif umsagna um drögin.