Heilbrigðisráðuneytið áformar að leggja fram frumvarp um breytingu á lögum nr. 41/2007, um landlækni og lýðheilsu, en frumvarpinu er ætlað að kveða á með ítarlegri hætti um efni 8. gr. laganna um heilbrigðisskrár. Samkvæmt gildandi lögum er heimilt að halda tilgreindar heilbrigðisskrár í þeim tilgangi að afla þekkingar um heilsufar og heilbrigðisþjónustu, hafa eftirlit með þjónustunni, tryggja gæði hennar og meta árangur þjónustunnar, ásamt því að nota þær við gerð áætlana um gæðaþróun í heilbrigðisþjónustunni og vísindarannsóknum. Síðasta áratug hafa miklar framfarir orðið í tækniþróun í heilbrigðiskerfinu og þörf á að uppfæra núgildandi ákvæði um heilbrigðisskrár til samræmis við þá þróun. Eru áform um að skilgreina frekar tilgang og markmið heilbrigðisskráa, kveða á um grunnskrár heilbrigðisþjónustu, meðferðartengdar heilbrigðisskrár, heilbrigðisskrár sem byggja á samþykki einstaklinga og gæðaskrár. Þá eru áform um að veita ráðherra skýrari heimild til að kveða á um heilbrigðisskrár sem heimilt er að halda í reglugerð, án þess að lagabreytingu þurfi til, auk þess sem áformað er að yfirfara ákvæði um persónugreinanlegar heilbrigðisskrár m.t.t. persónuverndar.