Á fáum sviðum er viðvarandi jafn hröð tækniþróun og raun ber vitni og á sviði fjar-skipta og netöryggis. Fjarskipti gegna lykilhlutverki í nútímasamfélagi og eru grundvöllur fyrir þjónustu á mörgum öðrum sviðum og því er sérstaklega mikilvægt að huga að því að öll umgjörð sé eins og best verður á kosið.

Með frumvarpi þessu eru lagðar til breytingar á lögum um fjarskipti, nr. 70/2022, og lögum um íslensk landshöfuðlén nr. 54/2021. Tilgangur þessara breytinga er þríþættur.

Í fyrsta lagi er þörf á nýju ákvæði í fjarskiptalög um opinn aðgang að fjarskiptanetum sem notið hafa ríkisaðstoðar, viðmið um verðlagningu slíkra neta og heimild Fjarskiptastofu til að skera úr um ágreining þar að lútandi sem og heimild stofnunarinnar til að veita undanþágu frá kröfu um að heildsöluaðgangur skuli byggja á verðsamanburði ef fyrirhuguð nýting á fjarskiptanetinu mun ekki standa undir slíku heildsöluverði.

Í öðru lagi til þess að tryggja lagastoð vegna innleiðingar reglna sem stafa af alþjóðlegum skuldbindingum Íslands á sviði fjarskipta, í samræmi við samninginn um Evrópska efnahagssvæðið, sbr. lög nr. 2/1993. Um er að ræða innleiðingu á reglugerð (EB) 2021/1232. Í reglugerðinni er kveðið á um undanþágur frá reglum um fjarskiptaleynd, til að gera rafrænum þjónustuaðilum tímabundið kleift að vakta hvort umferð um þeirra kerfi hefur að geyma barnaníðsefni, en þróaður hefur verið sérhæfður sjálfvirkur hugbúnaður í því skyni.

Í þriðja lagi er um að ræða breytingu á lögum um íslensk landshöfuðlén (lénalögum), einnig með það að markmiði að auka getu til að sporna við netglæpum, þar á meðan kynferðislegu ofbeldi gegn börnum. Með þessum breytingum er leitast við að auðvelda lögreglu að takast á við glæpi á netinu, með því að skerpa á heimildum lögreglu og verklagsreglum milli lögreglu og skráningarstofu íslenskra léna.