Með reglugerð þessari er innleidd reglugerð (ESB) 2017/2226 um komu- og brottfararkerfið með svokallaðri tilvísunaraðferð þar sem þýðing á reglugerð (ESB) 2017/2226 er birt sem fylgiskjal við reglugerðina sjálfa sem telur tíu ákvæði og kveður á um nánari útfærslu á reglunum miðað við aðstæður og kerfið hér á landi. Er m.a. kveðið á um lögbær yfirvöld í skilningi reglugerðarinnar, ábyrgð ríkislögreglustjóra þegar kemur að kerfinu , miðlæga aðgangsstöð og vinnslu persónuupplýsinga.

Komu- og brottfararkerfið verður sett upp á öllum ytri landamærastöðvum Schengen-svæðisins og mun halda rafræna skráningu um komur og brottfarir ríkisborgara þriðju ríkja sem heimiluð hefur verið stutt dvöl á svæðinu en einnig þá sem synjað hefur verið um komu til stuttrar dvalar. Kerfið reiknar þannig sjálfvirkt út tímalengd dvalar ríkisborgara þriðju ríkja á Schengen-svæðinu og er ætlað að bæta frekar stjórnun ytri landamæranna, koma í veg fyrir ólöglega fólksflutninga og auðvelda eftirlit með ferðum ríkisborgara þriðju ríkja til alls Schengen-svæðisins. Komu- og brottfararkerfið ætti, einkum og þegar við á, að stuðla að því að bera megi kennsl á einstaklinga sem uppfylla ekki, eða uppfylla ekki lengur, skilyrði um lengd heimilaðrar dvalar á yfirráðasvæði aðildarríkjanna. Kerfið kemur til með að nútímavæða og einfalda landamæraeftirlit, m.a. með því að koma í stað þeirrar skyldu landamæravarða að stimpla vegabréf ríkisborgara þriðju ríkja um komur og brottfarir, og með því næst samhæfð yfirsýn allra Schengen-ríkjanna yfir þá sem dvelja á Schengen-svæðinu fram yfir heimilaða dvöl.