Í gildandi lögum um Seðlabanka Íslands er kveðið á um að fjármálaeftirlitsnefnd taki allar ákvarðanir sem faldar eru Fjármálaeftirlitinu í lögum. Einnig er kveðið á um að nefndin geti framselt vald sitt til töku ákvarðana sem ekki teljast meiri háttar til varaseðlabankastjóra fjármálaeftirlits. Í skýrslu úttektarnefndar sem forsætisráðherra skipaði í júní 2021 til að annast úttekt á reynslunni af starfi nefnda Seðlabanka Íslands er bent á að með þessu fyrirkomulagi sé flækjustig aukið í rekstri og samskiptum við eftirlitsskylda aðila og að betur færi á því að Seðlabankanum væri falið í lögum að taka ákvarðanir á sviði fjármálaeftirlits. Þá var gerð athugasemd við hið umfangsmikla valdaframsal til varaseðlabankastjóra fjármálaeftirlits. Einnig kemur fram að rétt væri að afmarka þær ákvarðanir sem lagðar eru fyrir fjármálaeftirlitsnefnd og er lögð fram sú tillaga að ákvarðanir verði takmarkaðar við refsikennd viðurlög og íþyngjandi stjórnsýsluákvarðanir.

Í ljósi framangreindra ábendinga eru í frumvarpinu að finna tillögur að breytingum á lögum um Seðlabanka Íslands sem einkum lúta að því að Seðlabanki Íslands taki að meginstefnu þær ákvarðanir sem faldar eru Fjármálaeftirlitinu í lögum eða stjórnvaldsfyrirmælum, en að fjármálaeftirlitsnefnd taki eða hafi aðkomu í tilteknum tegundum veigameiri mála, sem að meginstefnu fela í sér beitingu stjórnsýsluviðurlaga og þvingunarúrræða.