Í lögum um stjórn fiskveiða er 2. mgr. 4. gr. stærðartakmörkun fyrir báta til að öðlast veiðileyfi með krókaaflamarki. Í lögunum kemur fram að þeir bátar einir geti öðlast veiðileyfi með krókaaflamarki sem eru styttri en 15 metrar að mestu lengd og minni en 30 brúttótonn. Í frumvarpinu er lögð til ný málsgrein í 4. gr. um að bátar sem nota vistvæna orkugjafa hafi heimild til að vera stærri en gildandi lög setja takmörkun um, þar sem slíkir bátar gera kröfu um aukið rými fyrir orkuinnihald, þ.e. stærri tanka eða rými fyrir rafhlöðu. Enn fremur þarf að huga að öryggi áhafnar ef notast er við eldfima orkugjafa og krefjast öryggisráðstafanir aukins rýmis í bátunum. Er því lagt til að krókaaflamarksbátum sem gangi að minnsta kosti til helminga fyrir vistvænum orkugjöfum verði heimilt að vera 50% stærri, eða 45 brúttótonn, en þeir bátar sem nú geta öðlast leyfi til veiða með krókaaflamarki.