Notendur sem njóta niðurgreiddrar rafhitunar eiga þess kost að sækja um eingreiðslu til Orkustofnunar vegna kaupa á varmadælu. Varmadælur bæta orkunýtingu og geta lækkað bæði rafhitunarkostnað notenda sem og niðurgreiðslukostnað af hálfu ríkisins.

Núverandi stuðningskerfi felur í sér eingreiðslu byggða á krónutölu niðurgreiðslna á hverju dreifisvæði sem þýðir að styrkur getur verið mishár eftir svæðum. Kerfið hefur reynst þungt og óskilvirkt í framkvæmd enda felur það í sér hátt flækjustig fyrir notendur og tímafreka umsýslu Orkustofnunar, en áform þessi stefna að því að einfalda niðurgreiðslukerfið og fjölga með því varmadælum, sem hefðu í för með sér ávinning fyrir neytendur, ríki, raforkukerfið og orkuskipti.

Áformað er að gera breytingu á 12. gr. laga nr. 78/2002 um niðurgreiðslu húshitunarkostnaðar. Í ákvæðinu er fjallað um fjárhæð styrkja. Áformað er að umorða 1. mgr. með þeim hætti að styrkir á grundvelli 5. tölul. 11. gr. (þ.e. styrkir til kaupa á varmadælu) miðist við tiltekið hlutfall af kostnaði vegna kaupa á búnaðinum.

Áformin eru opin til samráðs til 11. feb. nk.