Í kjölfar heimsfaraldurs kórónuveiru lagði framkvæmdastjórn ESB áherslu á að tryggja greiðsluhæfi og aðgengi að fjármagni til að styðja við endurbætur eftir efnahagslega áfallið sem COVID-19-heimsfaraldurinn hefur valdið. Í því skyni samþykkti framkvæmdastjórnin fjölda ráðstafana undir heitinu Endurbótapakki fyrir fjármagnsmarkaði. Ein þeirra ráðstafana, sem fellst í þeirri reglugerð sem hér er felld inn í EES-samninginn, var breyting á fyrir-komulagi lýsinga í því skyni að gera útgefendum og aðilum á fjármálamarkaði kleift að draga úr kostnaði og losa um fjármagn fyrir endurbótaferlið. Lýsing er samheiti yfir skjöl sem gefa þarf út vegna almenns útboðs verðbréfa eða töku verðbréfa til viðskipta á skipulegum markaði og er ætlað að gera fjárfestum kleift að taka upplýsta fjárfestingarákvörðun. Endurbótalýsing verðbréfa er einfaldaðra fyrirkomulag slíkrar upplýsingagjafar. Hér er því um ívilnandi ráð-stöfun að ræða fyrir fjármálafyrirtæki.

Reglugerð (ESB) 2021/337 felur í sér að létt er tímabundið og við tilteknar aðstæður á kröfum um efni lýsinga sem birta skal þegar verðbréf eru boðin í almennu útboði eða tekin til viðskipta á skipulegum markaði innan EES. Breytingunum er ætlað að gefa lánastofnunum svigrúm til að styðja við fyrirtæki sem þurfa á endurfjármögnun að halda eftir efnahagslega áfallið sem fyrirtæki hafa orðið fyrir vegna heimsfaraldurs kórónuveiru. Hvorki er gert ráð fyrir verulegum áhrifum á stjórnsýslu né að útgjöld ríkisins aukist vegna innleiðingar reglugerðarinnar. Efni frumvarpsins mun tímabundið einfalda staðfestingarferli lýsinga hjá Fjármálaeftirlitinu, verði það að lögum. Er því um ívilnandi lagasetningu að ræða.

Í frumvarpinu er einnig gert ráð fyrir tilteknum breytingum á lögum um upplýsingaskyldu útgefenda verðbréfa og flöggunarskyldu, nr. 20/2021, sem leiða af lögum um markaði fyrir fjármálagerninga, nr. 115/2021.