Samkvæmt lögum um Slysavarnaskóla sjómanna, nr. 33/1991 skal skólinn halda námskeið fyrir starfandi og verðandi sjómenn um öryggis- og björgunarmál á helstu útgerðarstöðum landsins og annast öryggis- og slysavarnarfræðslu fyrir nemendur í skipstjórnar- og vélstjórnarnámi.

Lög þessi eru að meginstefnu til óbreytt frá því þau öðluðust gildi 1991. Talin er þörf á uppfærslu á lögunum þannig að þau endurspegli þróun á rekstri skólans. Er þar átt við hlutverk skólanefndar og að um rekstur skólans sé nú ávallt gerður þjónustusamnngur milli aðila. Þá er þörf á að heimila að Slysavarnafélagið Landsbjörg megi reka Slysavarnaskóla sjómanna í sérstöku félagi sem er aðskilið frá öðrum rekstri félagsins.