Með reglugerðinni er undirstrikað það hlutverk dreifiveitna raforku að upplýsa notendur, jafnt nýja notendur sem og við notendaskipti, um rétt þeirra til að velja sér sölufyrirtæki og rétt til að skipta um sölufyrirtæki. Jafnframt er kveðið á um að sölufyrirtæki skuli hafa raforkusölusamninga aðgengilega á vefsíðu sinni og að raforkusölusamning við almenna notendur skuli staðfesta með rafrænum skilríkjum. Nánar er kveðið á um söluaðila til þrautavara í reglugerðinni og hvernig staðið skuli að vali á þeim sölufyrirtækjum sem falin er sú samfélagslega ábyrgð og skylda sem því afmarkaða hlutverki fylgir, þannig að tryggt sé að jafnræðis sé gætt. Markmið reglugerðarinnar er að auka neytendavernd og stuðla að aukinni samkeppni á raforkumarkaði, raforkunotendum til góða.