Frumvarpið var samið í dómsmálaráðuneytinu. Gildandi lög tóku gildi árið 1984 og er því þörf á uppfærslu ákveðinna ákvæða laganna, m.a. um framsal sakamanna, í samræmi við lög um meðferð sakamála sem tóku gildi árið 2008 og þá alþjóðasamninga sem Ísland er aðila að og varða málaflokkinn. Þá er brýn þörf á breytingu laganna er varðar feril beiðna um réttaraðstoð frá erlendum ríkjum í því skyni að gera ferilinn skilvirkari og hraðari og þannig að afgreiðsla beiðna verði í samræmi við nútíma skipan ákæruvalds, þar sem ríkissaksóknari er æðsti handhafi og eyði þeim ákvæðum laganna sem gera ráð fyrir að dómsmálaráðherra taki ákvörðun um hvort orðið skuli við beiðni um réttaraðstoð.