Frumvarpið felur í sér tillögu til breytinga á 1. gr. laganna þar sem fram koma markmið og gildissvið þeirra. Lagt er til að uppsetning 1. gr. laganna verði einfölduð og að eitt markmiða þeirra verði að styðja við svæðisbundna þróun og dreifingu ferðamanna um landið sem mun hafa áhrif við mat á umsóknum um styrki. Einnig er lagt til að ferðamannaleiðir verði styrkhæfar. Þá er lagt til að skýr skil verði sett milli Framkvæmdasjóðs ferðamannastaða og landsáætlunar um uppbyggingu innviða á ferðamannastöðum þannig að framkvæmdir á landsáætlun verði ekki styrkhæfar úr Framkvæmdasjóði ferðamannastaða.