Sjávarútvegs- og landbúnaðarráðherra birtir til umsagnar drög að frumvarpi til laga um breytingu á lögum um matvæli, lögum um eftirlit með fóðri áburði og sáðvöru, lögum um sjávarafurðir og lögum um slátrun og sláturafurðir, m.a. til einföldunar regluverks sem gildir um matvælakeðjuna og innleiðingar á reglugerð 2017/625/ESB um opinbert eftirlit.

Í samræmi við áherslur ríkisstjórnar um einföldun regluverks er markmið lagasetningarinnar að einfalda hið íslenska regluverk sem gildir um matvælakeðjuna, í þágu atvinnulífs og almennings. Auk þess er breytingunum ætlað að stuðla að samræmdara og skilvirkara eftirlitskerfi fyrir matvælakeðjuna í heild sinni sem leiðir af sér enn frekara matvælaöryggi og bættari neytendavernd.