Með frumvarpinu er lagt til að:

• Felldar verði brott úr 3. gr. laganna, kvaðir um lágmarksfjölda útvarps- og sjónvarpsstöðva sem Ríkisútvarpinu er skylt að dreifa um allt land. Með breytingunni verður stjórn RÚV heimilt að fækka útvarpsstöðvum. Ekki er talið nauðsynlegt eða æskilegt að fjöldi rása Ríkisútvarpsins sé sérstaklega tilgreindur í lögum.

• Gerðar verði breytingar á 14. gr. laganna, um tekjustofna Ríkisútvarpsins. Lagt er til að tekjur RÚV af útvarpsgjaldi verði skertar um fjárhæð sem nemur 10% af auglýsingatekjum RÚV á ári hverju. Hlutfallið reiknist af fjárhæð sem svarar til meðaltekna Ríkisútvarpsins af viðskiptaboðum næstu fjögur heilu reikningsár á undan. Jafnframt verði kveðið á um hámark („þak“) tekna Ríkisútvarpsins af viðskiptaboðum. Til frádráttar árlegum tekjum af útvarpsgjaldi komi fjárhæð sem nemur tekjum Ríkisútvarpsins af viðskiptaboðum umfram 2.800.000.000 kr. Hámarksfjárhæð tekur mið af meðaltali auglýsingatekna Ríkisútvarpsins 2022-2025 og ráðgert er að hún verði endurreiknuð við undirbúning fjárlaga hverju sinni að teknu tilliti til verðlagsbreytinga samkvæmt vísitölu neysluverðs.

Breytingarnar eru í samræmi við viðauka II við þjónustusamning ráðherra og Ríkisútvarpsins 2024-2027, þar sem fram kemur að dregið verði úr umsvifum RÚV á auglýsingamarkaði á samningstímabilinu. Þá er frumvarpið liður í aðgerðaráætlun stjórnvalda um málefni fjölmiðla sem kynnt var 19. desember 2025.

Frumvarpið hefur þau áhrif á ríkissjóð að hluti tekna ríkissjóðs af útvarpsgjaldi rennur ekki til Ríkisútvarpsins frá og með 2027. Áformað er að hækkun fjárframlaga til einkarekinna fjölmiðla í fjárlögum ár hvert taki mið af því. Komið verður til móts við tekjutap RÚV með því að færa skuldir vegna eldri lífeyrisskuldbindinga RÚV frá félaginu, eins og gert hefur verið hjá nær öllum opinberum aðilum og fyrirtækjum sem sinna opinberum rekstri.