Undirmál

Undirmál telst að hálfu til aflamarks, svo lengi sem undirmálsaflinn fari ekki yfir 10% af viðkomandi tegund í veiðiferð.

Það er skylda að hirða og landa öllum afla sem kemur í veiðarfæri fiskiskipa og er undirmálsreglan ein af þeim leiðum sem stjórnvöld setja fram til að fá sjómenn til að fylgja þeim reglum sem eru í gildi og vinna gegn brottkasti. Á móti kemur að þessi ívilnun getur skapað freistingar í þá átt að flokka stærri fisk sem undirmál.

Skráning undirmálsafla

• Skipstjóri fiskiskips á að tryggja að réttar og fullnægjandi upplýsingar um aflann berist til hafnarvigtarmanns.

• Undirmálsafla á að halda aðskildum frá öðrum afla skipsins og hann á að vigta sérstaklega af löggiltum vigtarmanni.

• Lengdarviðmið á undirmálsfiski eru mismunandi eftir tegundum, sbr. töfluna hér að neðan. 

Fiskistofa fylgist reglulega með löndunum á undirmáli og sannreynir að undirmál sé undir viðmiðunarmörkum og leiðréttir aflaskráningu ef svo er ekki.

Viðbrögð Fiskistofu vegna brota á þessari reglu fer eftir alvarleika brotsins, ítrekuð brot geta leitt til þess að skip sé svipt tímabundið leyfi til veiða í atvinnuskyni.