Íslenskir framhaldsskólar bjóða upp nám í áfanga- eða bekkjakerfi, sem veitir undirbúning fyrir frekara nám eða starfsréttindi.
Nám í framhaldsskóla er ekki skylda en öll eiga rétt á skólavist til 18 ára aldurs.
Opið fyrir umsóknir
Starfsbrautir: 1. febrúar – 28. febrúar
Innritun eldri nema: 14. mars – 26. maí
Innritun nemenda úr grunnskóla: 25. apríl – 10. júní
Svona sækir þú um
Skráðu þig inn með rafrænum skilríkjum (nemanda eða forsjáraðila).
Umsækjandi byrjar á því að samþykkja gagnaöflun þar sem meðal annars eru sóttar persónuupplýsingar úr þjóðskrá.
Sótt er um tvo skóla og tvær brautir innan hvers skóla. Möguleiki í boði fyrir nemendur úr 10. bekk að bæta við vali á þriðja skólanum.
Settu fylgigögn með umsókninni ef þess þarf. Dæmi um fylgigögn eru:
Vottorð eða sérstakar upplýsingar um sértæka námsörðugleika
Námsferil úr erlendum skólum og sértækum skólum. Einnig má senda slík gögn til viðkomandi skóla með pósti eða biðja viðkomandi grunnskóla um að senda þau.
Ekki skal senda greiningargögn og prófskírteini úr grunnskóla með umsóknum.
Þegar grunnskólum hefur verið slitið í vor flytjast skólaeinkunnir (lokavitnisburður) nemenda rafrænt til þeirra skóla sem þeir sóttu um hjá.
Skilyrði
Til að geta byrjað nám í framhaldsskóla þarftu að hafa lokið grunnskólanámi, grunnskólaprófi, hlotið jafngilda undirstöðumenntun eða vera orðin 16 ára.
Við hvetjum nemendur eindregið til að skoða inntökuskilyrði þeirra skóla sem þau hafa áhuga á áður en sótt er um. Inntökuskilyrðin má sjá á heimasíðu viðkomandi skóla.
Hvað gerist næst?
Eftir að innritun lokar, er ekki hægt að breyta umsókn.
Framhaldsskólar velja inn nemendur út frá þeim viðmiðum sem viðkomandi skóli hefur sett.
Staðfesting á skólavist
Framhaldsskólinn sem samþykkir umsóknina þína sendir þér
staðfestingu á skólavist
greiðsluseðil fyrir innritunargjöldum með tilgreindum greiðslufresti
Ef þú greiðir ekki gjaldið á réttum tíma er litið svo á að þú þiggir ekki veitta skólavist og afsalir þar með rétti þínum til skólavistar á viðkomandi önn.
Ef þú færð ekki skólavist
Fái umsækjandi ekki skólavist í þeim skólum sem sótt var um sér Miðstöð menntunar og skólaþjónustu um að tryggja öllum undir 18 ára skólavist.
Stefnt er að því að öll hafi fengið skólavist fyrir lok júní 2025.
Vantar þig frekari aðstoð?
Þú getur sent okkur spurningar á netfangið innritun@midstodmenntunar.is
Þjónustuaðili
Miðstöð menntunar og skólaþjónustu