Lektor á sviði skattaréttar og félagaréttar, Lagadeild, Félagsvísindasvið Háskóla Íslands

Laust er til umsóknar fullt starf lektors á sviði skattaréttar og félagaréttar við Lagadeild Félagsvísindasviðs Háskóla Íslands.

Gert er ráð fyrir að áherslusvið lektorsins séu kennsla og rannsóknir á sviðum skattaréttar og félagaréttar og gefur starfið færi á að móta og þróa uppbyggingu þessara réttarsviða við Lagadeild. Gert er ráð fyrir að lektorinn sinni fyrst og fremst kennslu í framhaldsnámi í lögfræði en einnig í grunnnámi eftir því sem þörf krefur. Einnig getur komið til þess að lektornum verði falið að sinna kennslu í öðrum fræðigreinum í samræmi við þekkingu sína og þarfir Lagadeildar á hverjum tíma. Þá felst hluti af starfsskyldum lektors í þátttöku í verkefnum á vegum deildar og fræðasviðs. Leitað er að einstaklingi sem hefur brennandi áhuga á að helga sig kennslu, fræðastörfum og framþróun Lagadeildar.

• Umsækjandi skal hafa lokið fullnaðarnámi í lögfræði með meistara- eða kandídatsprófi frá íslenskum háskóla eða sambærilegu prófi frá erlendum háskóla og hafa þekkingu og reynslu í samræmi við alþjóðleg viðmið fyrir viðkomandi starfsheiti á fræðasviðinu sem staðfest er með áliti dómnefndar eða með doktorsprófi frá viðurkenndum háskóla.

• Frekara framhaldsnám á sviðum skattaréttar og félagaréttar, þ.m.t. doktorspróf á fræðasviðunum, er kostur.

• Góð almenn þekking á íslenskum rétti og reynsla af lögfræðistörfum þar sem reynt hefur á notkun réttarreglna við úrlausn raunhæfra lögfræðilegra viðfangsefna.

• Kennslureynsla á háskólastigi og góð hæfni til að miðla þekkingu.

• Virkni og hæfni í rannsóknum á sviði lögfræði.

• Hæfni í mannlegum samskiptum, áreiðanleiki, frumkvæði og sjálfstæði í vinnubrögðum

Laun samkvæmt gildandi kjarasamningi sem fjármála- og efnahagsráðherra og Félag háskólakennara hafa gert.

Við ráðningu verður litið til þess að sá er starfið hlýtur falli sem best að aðstæðum og þörfum Lagadeildar og Félagsvísindasviðs.

Ráðið verður í starfið til fimm ára með möguleika á ótímabundinni ráðningu að þeim tíma liðnum, sbr. 3. mgr. 31. gr. reglna fyrir Háskóla Íslands nr. 569/2009.

Starfið er laust frá 1. janúar 2026 og er miðað við að ráðið sé í starfið frá þeirri dagsetningu, þó ekki fyrr en lokið er störfum þeirra nefnda sem um ráðninguna fjalla.

Umsækjendur skulu láta eftirfarandi gögn fylgja umsókn sinni.

Í umsókn skal koma fram hvert ritverka sinna, allt að átta talsins, umsækjandi telur veigamest með tilliti til þess starfs sem um ræðir. Umsækjandi sendir eingöngu þessi ritverk sín með umsókn eða vísar til þess hvar þau eru aðgengileg á rafrænu formi. Þegar fleiri en einn höfundur stendur að innsendu ritverki skal umsækjandi gera grein fyrir framlagi sínu til verksins. Enn fremur skal umsækjandi láta fylgja með umsagnir um kennslu- og stjórnunarstörf sín eftir því sem við á.

Umsóknargögnum sem ekki er hægt að skila rafrænt skal skila í tvíriti til vísinda- og nýsköpunarsviðs Háskóla Íslands, Sæmundargötu 2, 101 Reykjavík.

Um meðferð umsókna, mat á hæfni umsækjenda og ráðningu í starfið er farið eftir ákvæðum laga nr. 85/2008 um opinbera háskóla og reglna nr. 569/2009 fyrir Háskóla Íslands. Samkvæmt 38. gr. reglnanna er rektor heimilt að veita framgang í starf dósents eða prófessors við nýráðningu uppfylli viðkomandi þau skilyrði.

Öllum umsóknum verður svarað og umsækjendum tilkynnt um ráðstöfun starfsins þegar ákvörðun hefur verið tekin. Umsóknir geta gilt í sex mánuði frá lokum umsóknarfrests.

Við ráðningu í störf í Háskóla Íslands er tekið mið af jafnréttisáætlun skólans.

Vakin er athygli á málstefnu Háskóla Íslands.

Lagadeild Háskóla Íslands er ein sex deilda Félagsvísindasviðs og hefur verið starfrækt frá stofnun skólans árið 1911. Markmið Lagadeildar er að brautskrá framúrskarandi lögfræðinga sem eigi ríkan þátt í að efla og styrkja íslenskt réttarkerfi í nútíð og framtíð.

Á Félagsvísindasviði starfa á þriðja hundrað manns að kennslu og rannsóknum. Vísindafólk sviðsins stundar grunnrannsóknir, hagnýtar rannsóknir og þjónusturannsóknir og lögð er áhersla á fjölbreytta miðlun þekkingar, öflugar samræður við íslenskt samfélag og alþjóðlega fræðasamfélagið.

Háskóli Íslands er alþjóðlegur rannsóknaháskóli og stærsta kennslu-, rannsókna- og vísindastofnun landsins. Um 1.500 starfsmenn starfa í föstum störfum við skólann og um 2.200 eru lausráðnir. Nemendur við skólann eru um 12.500. Skólinn skiptist í sex grunneiningar, miðlæga stjórnsýslu og fimm fræðasvið. Háskóli Íslands býður fjölbreytt nám á öllum stigum og er eini háskóli landsins sem býður grunn- og framhaldsnám á öllum helstu fræðasviðum.