Þegar framkvæmdaraðili hefur skilað matsáætlun til Skipulagsstofnunar kynnir stofnunin hana opinberlega fyrir almenningi og hefur aðgengilega á Skipulagsgátt og vef stofnunarinnar. Almenningi gefst þá kostur á að kynna sér matsáætlunina og senda umsögn til Skipulagsstofnunar.

Þegar Skipulagsstofnun hefur gefið út álit sitt um matsáætlun framkvæmdaraðila er álitið ásamt matsáætluninni gerð aðgengilegt á vef stofnunarinnar. Þeir sem gáfu umsagnir í ferlinu fá einnig tilkynningu um að álitið liggi fyrir.

Kynning og samráð við almenning við vinnslu umhverfismatsskýrslu fer eftir aðstæðum í hverju tilviki, í samræmi við það sem lýst er í matsáætlun fyrir viðkomandi framkvæmd.

Þegar framkvæmdaraðili hefur lagt fram umhverfismatsskýrslu til Skipulagsstofnunar kynnir stofnunin fyrirhugaða framkvæmd og umhverfismatsskýrslu fyrir almenningi og hefur aðgengilega á netinu. Þá gefst almenningi kostur á að kynna sér framkvæmdina og umhverfismat hennar og senda Skipulagsstofnun umsögn.

Skipulagsstofnun vinnur álit um mat á umhverfisáhrifum framkvæmdarinnar á grundvelli umhverfismatsskýrslu framkvæmdaraðila, framkomnum umsögnum umsagnaraðila og almennings. Álit Skipulagsstofnunar er kynnt þeim aðilum sem veittu umsögn um umhverfismatsskýrsluna og er gert aðgengilegt almenningi á netinu.

Almennt geta þeir sem eiga lögvarða hagsmuni tengda ákvörðun um hvort framkvæmdir í flokki B skuli háðar umhverfismati, kært ákvörðun til úrskurðanefndar umhverfis- og auðlindamála. Það á til dæmis við landeigendur, nágranna, veiðifélög eða umhverfisverndar-, útivistar-, og hagsmundasamtök sem uppfylla tiltekin skilyrði.

Álit Skipulagsstofnunar um mat á umhverfisáhrifum framkvæmdar og álit stofnunarinnar um matsáætlun eru ekki kæranleg. Hins vegar er þeim sem eiga lögvarða hagsmuni, þar með talið umhverfisverndar-, útivistar- og hagsmunasamtökum, heimilt að kæra leyfi vegna framkvæmda sem falla undir lög um umhverfismat framkvæmda og áætlana, til úrskurðarnefndar umhverfis- og auðlindamála.