Ef áætlun er háð umhverfismati gefst almenningi kostur á að kynna sér og gera athugasemdir við tillögu að viðkomandi áætlun og umhverfismati hennar á kynningartíma.
Í sumum tilvikum gefst almenningi kostur á að kynna sér og gera athugasemdir við matslýsingu umhverfismats, í upphafi umhverfismatsvinnunar.
Skipulagsáætlanir sveitarfélaga (svæðis-, aðal- og deiliskipulag):
Sveitarfélög kynna lýsingu skipulagsverkefnis opinberlega í upphafi skipulagsvinnu þar sem tilgreint er hvernig fyrirhugað er að standa að umhverfismati skipulagstillögunnar.
Þar gefst almenningi kostur á að kynna sér og hafa áhrif á hvernig staðið verður að umhverfismatinu.
Aðrar áætlanir:
Ekki er gerð krafa um að matslýsing annarra áætlana en skipulagsáætlana sveitarfélaga sé kynnt almenningi. Þó eru mörg dæmi um að það sé gert.
Þá gefst almenningi kostur á að kynna sér og hafa áhrif á hvernig staðið verður að umhverfismatinu. Markvisst samráð frá fyrstu stigum getur jafnframt skilað forsvarsaðilum áætlanagerðarinnar gagnlegum upplýsingum inn í vinnuna.
Kynning og samráð við almenning við vinnslu umhverfismatsins fer eftir aðstæðum í hverju tilviki, í samræmi við það sem lýst er í matslýsingu fyrir viðkomandi áætlun.
Þegar endanleg tillaga að áætlun og umhverfismati hennar liggur fyrir, ber forsvarsaðili áætlunarinnar ábyrgð á að tillagan og umhverfismatið sé kynnt almenningi.
Almenningi skal gefinn sex vikna frestur til að kynna sér tillöguna og umhverfismat hennar og koma á framfæri athugasemdum.
Við endanlega afgreiðslu áætlunar skal hafa hliðsjón af þeim athugasemdum sem borist hafa við tillögu og umhverfismat hennar.
