Embætti landlæknis og sóttvarnalæknir vara við því að einstaklingar gangist undir meðferðir hjá aðilum sem ekki hafa starfsleyfi frá embætti landlæknis. Tilefnið er tilkynningar um alvarlegar bótúlíneitranir eftir aðgerðir á snyrtistofum í Bretlandi síðustu þrjá mánuði. Bótúlíneitur er mikið notað við fegrunarmeðferðir en einnig við margvíslegum öðrum heilsuvandamálum. Tilkynning um alvarlegar eitranir af bótúlínum-lyfjavöru var nýlega send í gegnum EWRS tilkynningakerfi ESB, sem miðlar upplýsingum um heilsufarsógnir á milli aðildarríkja og samstarfsaðila.

Tæplega 40 tilvik bótúlíneitrana hafa verið staðfest í Bretlandi en um var að ræða fegrunarmeðferðir þar sem bótúnlíneitri var sprautað. Helstu eitrunareinkenni voru óskýrt tal og erfiðleikar við kyngingu og/eða öndun. Greint var frá því að 22 einstaklingar hafi verið lagðir inn á sjúkrahús, þar af sjö á gjörgæslu. Þó svo að bótúlíneitranir séu óalgengar geta þær verið lífshættulegar.

Í tilefni af tilkynningu um alvarleg veikindi í Bretlandi hefur embættið upplýst Landspítala og aðra viðbragðsaðila í heilbrigðisþjónustunni. Þeir sem farið hafa í fegrunarmeðferð á undanförnum vikum þar sem bótúlínum-lyfjavara var notuð af einstaklingi sem ekki hefur starfsleyfi geta haft samband við síma 1700 fyrir ráðgjöf.

Embætti landlæknis ítrekar að einstaklingar sem hafa hug á að fara í meðferð með bótúlínlyfi gangi úr skugga um að sá sem veitir meðferðina sé læknir með gilt starfsleyfi landlæknis. Hægt er að athuga hvort viðkomandi sé með starfsleyfi í starfsleyfaskrá embættis landlæknis en aðeins þeir sem eru með starfsleyfi eru í skránni.

Umrætt efni er virka efnið í viðurkenndum lyfjum sem eru löglega á markaði hér á landi og notuð sem slík með lögmætum hætti.

Embætti landlæknis hefur enn sem komið er ekki fengið upplýsingar um bótúlíneitranir hér á landi, en það getur tekið allt að 4 vikur fyrir einkenni að koma fram. Hins vegar hefur embættið upplýsingar um að vörur sem innihalda bótúlíneitur séu fluttar ólöglega til Íslands og notaðar hér á landi. Eðli málsins samkvæmt getur embættið ekki sagt til um hvort um sé að ræða sömu vöru hérlendis og í Bretlandi. Embættið hefur upplýst lögreglu um mál sem varða notkun ólöglegra lyfja af þessum toga.

Frekari upplýsingar veitir Kjartan Hreinn Njálsson aðstoðarmaður landlæknis (kjartan.h.njalsson@landlaeknir.is).