Nýjar niðurstöður úr könnunum á vegum embættis landlæknis sýna að þrír af hverjum fjórum fullorðnum ná opinberum ráðleggingum um hreyfingu – að lágmarki 150 mínútur af rösklegri eða kröftugri hreyfingu á viku. Ákveðnir hópar, einkum þeir sem búa við skertar fjárhagslegar aðstæður, eiga þó erfiðara með að koma hreyfingu inn í daglegt líf.

Í fyrsta sinn eru nú einnig gefnar út sjálfstæðar ráðleggingar um að takmarka kyrrsetu. Langvarandi seta getur haft neikvæð áhrif á heilsu og niðurstöðurnar sýna að margir sitja stóran hluta dags – sérstaklega yngra fólk og þau sem búa á höfuðborgarsvæðinu.

Embættið hvetur öll til að hreyfa sig reglulega og brjóta upp kyrrsetu – til dæmis með því að ganga eða hjóla hluta leiðar. Átakið Hjólað í vinnuna, sem hefst 7. maí, er frábært tækifæri til að hefja heilbrigðari lífsstíl á einfaldan og hvetjandi hátt.

Frekari upplýsingar
Kjartan Hreinn Njálsson, aðstoðarmaður landlæknis
kjartan.h.njalsson@landlaeknir.is