Mikil og góð reynsla er nú komin á Heimaspítala HSU, sem hef­ur verið starf­rækt­ur hjá Heilbrigðisstofnun Suðurlands á Sel­fossi undanfarin misseri. Frumkvöðull Heimaspítalans er Guðný Stella Guðna­dótt­ir, lyf- og öldrunarlæknir, sem segir spítalann þann fyrsta sinnar tegundar á Íslandi. HSU rekur þríþætta þjónustu í heimahúsum: Heimaspítalann, líknarteymi og hefðbundnar vitjanir heimilislæknis.

Betri þjónusta og meiri skilvirkni

Guðný Stella segir samfélagið standa andspænis mikilli fjölgun í elsta aldurshópnum. ,,Því ber að fagna. Eldra fólk gefur svo mikið af sér til samfélagsins. En í þessari fjölgun felast líka ærin verkefni í heilbrigðisþjónustu. Um áttatíu prósent fólks 65 ára og eldra þurfa fremur litla þjón­ustu hjá heil­brigðis­kerf­inu, en hin tuttugu prósentin geta þurft mjög mikla þjónustu. Við hjá Heimaspítala HSU sinnum einnig fólki með líknandi áherslur í meðferð á öllum aldri og fólki sem er með fatlanir og á erfitt með að koma á heilsugæsluna. Heimaspítali HSU var þróaður til að mæta þörfum þessara hópa. Þannig fer saman bætt þjónusta og aukin skilvirkni."

Vaxandi þróun í heilbrigðiskerfinu

Al­geng­ustu viðfangsefni Heimaspítal­ans eru mæði og slapp­leiki, sem gjarn­an tengjast hjarta- eða lungna­sjúk­dóm­um. Um 20% sjúk­ling­a Heimaspítalans fá líkn­ar­meðferð. Guðný Stella segir að hægt sé að veita afbragðsgóða heil­brigðisþjón­ustu í heima­hús­um, sambærilega sjúkra­húsþjón­ustu að flestu leyti. Hún kveður göngu- og dag­deild­arþjón­ustu sjúkra­húsa vera hvarvetna mjög vax­andi, ásamt fjarvöktun í heima­hjúkr­un, og vill efla heima­hjúkr­un og vitj­anaþjón­ustu heim­il­is­lækna, ásamt því að stuðla að mögu­leik­um til end­ur­hæf­ing­ar í heimahúsum.

Mikil ánægja með verkefnið

,,Heimaspítalinn gengur mjög vel. Við erum að sinna flóknum sjúklingahópi og fækka komum á bráðamóttöku. Þetta eru sjúk­ling­ar með margbrotnar þarf­ir sem farnast oft ekki vel inni á sjúkra­hús­um. Heimaspítalinn sinn­ir þörfum þessa veik­asta hóps prýðilega, en þó með aðferðum sem eru einfaldari og ódýr­ari en vist á sjúkra­húsi. Það ríkir mikil ánægja með verkefnið meðal skjólstæðinga og ættingja þeirra og starfsfólks."

Þjónustusvæði heimaspítalans stækkað

Þjónustusvæði Heimaspítala HSU er sveitarfélagið Árborg og þar búa um 12 þúsund manns, en skjólstæðingar Heimaspítalans voru um 120 talsins 2024. ,,Við höfum í huga að stækka þjónustusvæðið út fyrir Árborg á næstu mánuðum. Ef við lítum á aðrar nýjungar á döfinni, þá erum við nýbyrjuð að gefa fólki súrefni heima vegna bráðra veikinda. Við læknarnir í Heimaspítalanum ætlum sömuleiðis að læra að ómskoða eins og bráðalæknar gera í dag og fara að gera það í vitjunum þegar þörf. Jafnframt erum við að velta fyrir okkur að prófa fjarviðtöl læknis."

Thelma Dröfn Ásmundsdóttir hjúkrunarfræðingur, Guðný Stella Guðnadóttir læknir og Sólveig Hrönn Gunnarsdóttir hjúkrunarfræðingur.

Sólveig Hrönn, Thelma Dröfn og Guðný Stella.