Í ung- og smábarnavernd er lögð áhersla á að fylgjast með líkamlegum, andlegum og félagslegum þroska barnanna og veita stuðning og fræðslu eftir þörfum hverrar fjölskyldu.
Foreldrum nýfæddra barna er boðið upp á heimavitjanir fyrstu vikurnar og að koma síðan í kjölfarið á heilsugæslustöðina með barnið í skoðanir. Fjöldi vitjana fer eftir þörfum hverrar fjölskyldu. Í heimavitjunum skoðar hjúkrunarfræðingur eða ljósmóðir barnið, metur þroska þess, þyngd og höfuðummál. Foreldrar fá ráðgjöf og fræðslu varðandi ummönnun barnsins og eigin líðan.
Við 6 vikna aldur barnsins er fyrsta skoðun á heilsugæslustöð hjá hjúkrunarfræðingi/ ljósmóður og lækni og við 3ja mánaða aldur hefjast bólusetningar samkvæmt fyrirmælum sóttvarnalæknis hjá Landlæknisembættinu. Reglulegar skoðanir og þroskamöt eru upp að 4 ára aldri. Reynt er að hafa samfellu í þjónustu þannig að barnið/fjölskyldan hitta sem oftast sama/sömu hjúkrunarfræðing/ljósmóður og lækni. Foreldrum er ávallt velkomið að hafa samband umfram þessar skipulögðu skoðanir.
Heyrnar- og talmeinastöð Íslands sér um heyrnamælingu á nýburum ef þau hafa ekki verið heyrnarmæld á fæðingadeildinni. Tímapantanir eru í síma 581 3855, gott er að láta vita að þið viljið fá tíma á Akureyri. Allir foreldrar eru hvattir til að koma með börnin sín í mælingu, þeim að kostnaðarlausu.
