Fæðingarorlof

Skilyrði fyrir umsókn

Það foreldri sem fer með forsjá barns verður að veita samþykki fyrir því að forsjárlausa foreldrið hafi umgengni við barnið þann tíma sem það hyggst vera í fæðingarorlofi. Liggi samþykki fyrir, getur forsjárlausa foreldrið átt rétt á fæðingarorlofi eða fæðingarstyrk eftir því sem við á. 

Forsjárforeldrið getur veitt samþykki sitt:

• á eyðublaðinu Umsókn um fæðingarstyrk / Umsókn um greiðslur úr Fæðingarorlofssjóði

• á eyðublaðinu Umgengnisréttur forsjárlauss foreldris í fæðingarorlofi

• í stafrænni umsókn um fæðingarorlof/fæðingarstyrk

Umsókn og fylgigögn

Auk samþykkisins verður faðernisviðurkenning að fara fram og fæðingarvottorð barns að fylgja umsókninni. 

Fæðingarvottorð eru gefin út af Þjóðskrá, en faðernisviðurkenning getur farið fram: 

• hjá sýslumanni

• fyrir dómara í dómsmáli til feðrunar barns

• með skriflegri yfirlýsingu og skal undirritun hennar staðfest af lögmanni eða tveimur vitundarvottum. Þar skal koma fram að útgefandi yfirlýsingarinnar hafi skrifað undir hana í viðurvist vottanna og þarf kennitala þeirra að fylgja með.