STCW Atvinnuskírteini sjómanna á farþega eða flutningaskipum

Umsókn um STCW réttindaskírteini

STCW-skírteini eru alþjóðleg atvinnuskírteini til starfa á farþega- og flutningaskipum í samræmi við alþjóðlegar skuldbindingar samkvæmt STCW alþjóðasamþykktinni. Samgöngustofa gefur út, áritar og heldur skrá yfir atvinnuskírteini sjómanna samkvæmt lögum um áhafnir skipa.

Eingöngu lögmætur handhafi skírteinis má gegna því starfi sem skírteinið kveður á um.
Skipverji skal ávalt geta framvísað skíteini er hann gegnir stöfum sínum.

Umsóknarferli og fylgigögn

Þeir sem ætla að sækja um alþjóðleg atvinnuskírteini til að starfa á farþega- og flutningaskipum, þurfa að fylla út rafræna umsókn.

Eftirtalin gögn þurfa að fylgja umsókn áður en hún er tekin til afgreiðslu:

Gilt læknisvottorð (pdf) frá viðurkenndum sjómannalækni.
Nýleg mynd í vegabréfsstærð - stafræn
Rithandarsýnishorn (pdf).
Staðfesting á greiðslu skírteinis.
Staðfesting á að hafa lokið tilskildum námskeiðum hjá Slysavarnarskóla sjómanna.
Skjöl um tilskilinn siglingatíma (ef siglingatími er erlendis, þá með sjóferðabók eða vottorði útgerðar).
Afrit af prófskírteini frá skóla (ef sótt er um í fyrsta sinn eftir að námi lýkur).
Afrit af GMDSS; GOC eða ROC skírteini í gildi (aðeins fyrir skipstjórnarmenn).

Gögnin er hægt að senda rafrænt sem fylgiskjöl með umsókninni. Einnig er hægt að senda gögn á netfangið sigling@samgongustofa.is eða í pósti merkt Samgöngustofa, Ármúli 2, 108 Reykjavík.

Afgreiðsla

Samgöngustofa miðar við að afgreiða skírteini innan 12 virkra daga frá því öll gögn hafa borist. Umsókn er aðeins tekin til afgreiðslu þegar gjald hefur verið greitt. Umsækjendur geta óskað eftir því að fá skírteinið sent í pósti eða sótt það á skrifstofu Samgöngustofu.

Greiðsla

Gjald fyrir umsókn um útgáfu og/eða endurnýjun atvinnuskírteina fyrir farþega- og flutningaskip (STCW) fer eftir gjaldskrá Samgöngustofu.

Auknar kröfur vegna breytinga á reglugerðum

Námskeið í verndarskyldu (Security awareness and security duties)

Fyrir þá sem hyggjast starfa á skipum, sem starfa samkv. ISPS kóðanum (flutninga- og farþegaskip í millilandasiglingum) er gerð krafa um námskeið í verndarskyldu í samræmi við reglu VI/6 í STCW-kóðanum.

Námskeið í mannauðsstjórnun í brú/vél (ERM-engine room resource management /BRM- bridge resource management).

Gerð er krafa um að farmenn hafi sótt námskeið í mannauðsstjórnun í brú eða vél. Stýrimenn og skipstjórar útskrifaðir úr skipstjórnarskóla eftir vorið 2008 og vélstjórar útskrifaðir úr vélstjóranámi eftir vorið 2012 þurfa ekki námskeið, enda eiga að hafa fengið fullnægjandi stjórnunarkennslu.

Námskeið um rafræn sjókorta- og upplýsingakerfi, ECDIS.

Skipstjórar og stýrimenn þurfa að sækja slíkt námskeið ella fá eftirfarandi takmörkun í réttindaskírteini „ not valid on ships equipped with ECDIS“

Réttindaskírteini – CoC (Certificate of Competency)

Til handa skipstjórum, stýrimönnum, vélstjórum, GMDSS fjarskiptamönnum og skiparafvirkjum. Réttindaskírteini, CoC, er jafnan staðfesting þess að handhafi hafi lokið námskeiðum eða endurmenntun í grunnöryggisfræðslu, líf-og léttbátanámskeiði, framhaldsnámskeiði í eldvörnum og sjúkrahjálp (yfirmenn í brú og vél) og læknisverkum (yfirmenn í brú) eftir því sem við á.

Hæfnisskírteini – CoP (Certificate of Proficiency)

Til handa aðstoðarmönnum í brú og vél, sérhæfðum þilfarsliðum og sérhæfðum vélaliðum, verndarfulltrúum skipa (SSO), aðstoðarmanni rafvirkja og til staðfestingar hvers konar námskeiðum (s.s. yfirmanna á tankskipum og farþegaskipum ) og hvers konar þjálfun sem hefur verið aflað.

Laga og reglugerðastoð

Skírteinin eru gefin út af Samgöngustofu samkvæmt lögum um áhafnir skipa og reglugerðar um menntun, þjálfun og atvinnuréttindi farmanna og gilda til starfa á farþega- og flutningaskipum sem skráð eru í ríkjum sem eru á hvítlista Alþjóðasiglingamálastofnunarinnar (IMO) yfir ríki sem uppfylla kröfur STCW-alþjóðasamþykktarinnar.
Lög um áhafnir skipa nr. 82/2022
Reglugerð um menntun, þjálfun og atvinnuréttindi farmanna. nr. 676/2015

Umsókn um STCW réttindaskírteini

Þjónustuaðili

Samgöngustofa

Tengt efni

Undanþágur til að gegna stöðu á skipi án tilskilinna réttinda

Skipstjórnar og vélstjórnarréttindi á björgunarskip

Atvinnuskírteini fyrir hafnsögumenn

STCW-F Atvinnuskírteini fyrir sjómenn á fiskiskipum, varðskipum eða öðrum skipum