Síðast uppfært 10.3.2020

Ísland.is – Beint að efninu

Efling stafrænnar þjónustu er eitt af forgangsmálum stjórnvalda og unnið er að því markmiði að stafræn samskipti verði meginsamskiptaleið almennings við hið opinbera.

Verkefnastofa um stafrænt Ísland, sem starfar á vegum fjármála- og efnahagsráðuneytisins, hefur það hlutverk að tryggja markmið ríkisstjórnarinnar í þessum málaflokki. Verkefnastofan vinnur með ráðuneytum, stofnunum og öðrum opinberum aðilum að því að efla stafræna þjónustu við almenning og tryggja þannig skýr, einföld og hraðvirk samskipti.

Helstu áherslusvið Stafræns Íslands eru:

  • Stafræn samskipti við almenning: Setja í loftið nýjan vef Ísland.is og stórefla stafræna þjónustu með nýrri ásýnd, léttara vörumerki í takt við tímann og framúrskarandi þjónustuupplifun.
  • Sjálfsafgreiðsla: Allir ferlar hins opinbera verði aðgengilegir í gegnum miðlæga þjónustugátt Island.is í sjálfsafgreiðslu innan þriggja ára.
  • Stafrænir innviðir: Innleiðing og virkjun gagnaþjónustlagsins Straumsins (X-Road), að fyrirmynd Eistlands og Finnlands, til að samræma vefþjónustur og gagnaflutningslag hins opinbera með opnum hugbúnaði.

Áætlað er að á næstu þremur til fimm árum geti ríkið sparað um 9,6 milljarða á ári í kjölfar innleiðingar á stafrænni þjónustu. Þjóðhagslegur ávinningur felur þó í sér enn meiri hagræðingu því bæði einstaklingar og fyrirtæki munu upplifa mikinn tímasparnað og einföldun í samskiptum sínum við hið opinbera, auk þess sem innleiðingin hefur jákvæð umhverfisleg áhrif. Sem dæmi má nefna að frá 1. maí 2020 munu stofnanir ríkisins senda alla reikninga rafrænt sem mun spara um 200 milljónir árlega í prentkostnað og sendingargjöld.

Ný ásýnd og merki Ísland.is

Þann 10. mars 2020 var nýtt merki og ásýnd Ísland.is kynnt. Nýtt útlit markar upphafið af stórbættri stafrænni þjónustu hins opinbera og endurspeglar kröfur nútímans um sjálfvirkni, einfaldleika og stafrænar lausnir.

Punktarnir í nýju merki tákna net ólíkra tengsla og sýna sambandið á milli einstaklinga, stofnana og gagna. Úr punktunum má auk þess greina bókstafina is, tákn léna á Íslandi, sem vísa í þjónustu á stafrænum vettvangi.

 

Nýtt merki Ísland.is:

Merki Ísland.is fyrir snjallforrit:

Merki Ísland.is kvikað (smellið á mynd til að spila):

 

Markmiðið er að einstaklingar og fyrirtæki geti nálgast opinbera þjónustu á einfaldan hátt, á einum stað. Þetta markmið er fangað í nýju slagorði:

Á Ísland.is getur þú smám saman nálgast alla þjónustu á einum stað – þú kemst beint að efninu