Stuðningslán, viðspyrna vegna COVID-19

Stuðningslánum er ætlað að styðja við smærri fyrirtæki sem glíma við erfiðleika. Lánin nýtast litlum og meðalstórum fyrirtækjum sem orðið hafa fyrir miklum samdrætti. Stuðningslán getur numið allt að 10% af tekjum fyrirtækja á rekstrarárinu 2019.

Hámarksupphæð og vaxtakjör

• 40 milljónir króna að hámarki á hvert fyrirtæki

• 1% breytilegir vextir, m.v. meginvexti Seðlabankans, fyrir lán að 10 milljónum króna.

Umsóknarfrestur

Hægt verður að sækja um lán til loka árs 2020. Athugaðu að lán verða ekki veitt eftir lok árs 2020 svo mikilvægt er að sækja um tímanlega.

Afgreiðsla láns

Ef fyrirtæki skráir öll viðeigandi gögn í umsóknarferlinu á Ísland.is og uppfyllir skilyrði fyrir veitingu láns, fær lánastofnun umsóknina rafrænt til afgreiðslu og ætti hún að geta veitt lánið innan nokkurra daga eftir að umsókn berst.

Kostnaður

Lánastofnun er heimilt að innheimta þóknun, sem skal dregin frá útborgun láns, til að standa undir kostnaði við umsýslu lána. Þóknunin skal að hámarki nema 2% af höfuðstól láns.

Endurgreiðsla láns

Stuðningslánið skal veitt til 30 mánaða og skal það endurgreitt, að meðtöldum vöxtum, með tólf jöfnum greiðslum síðustu tólf mánuði lánstímans.

Auka stuðningslán geta verið veitt til lengri tíma.

Hver getur sótt um

Til þess að sækja um stuðningslán þarf umsækjandi að vera prókúruhafi rekstraraðila. Hægt er að skoða tengsl við fyrirtæki inn á skattur.is.