Skráning fyrirtækja í Ferðagjöfina

Fyrirtæki sem uppfylla eitt af eftirtöldum skilyrðum og eru með starfsstöð á Íslandi geta skráð sig í Ferðagjöfina:

1. Fyrirtæki með gilt leyfi Ferðamálastofu skv. III. kafla laga um Ferðamálastofu, nr. 96/2018.

2. Fyrirtæki með gilt rekstrarleyfi skv. 7. gr. laga um veitingastaði, gististaði og skemmtanahald, nr. 85/2007.

3. Fyrirtæki með gilt starfsleyfi frá viðeigandi heilbrigðisnefnd sem hefur verið gefið út vegna veitingastaða í flokki I, sbr. 3. mgr. 4. gr. laga um veitingastaði, gististaði og skemmtanahald, nr. 85/2007.

4. Ökutækjaleigur með gilt starfsleyfi frá Samgöngustofu skv. 1. mgr. 3. gr. laga um leigu skráningarskyldra ökutækja, nr. 65/2015.

5. Söfn og fyrirtæki sem bjóða sýningu gegn endurgjaldi þar sem áhersla er á íslenska menningu, sögu eða náttúru.

Nánari upplýsingar og spurningar varðandi þátttöku fyrirtækja beinast til Ferðamálastofu, grunnur@ferdamalastofa.is.

Ferðagjöfin felur í sér ríkisaðstoð í skilningi EES-samningsins. Samkvæmt tímabundnum reglum um ríkisaðstoð til stuðnings hagkerfisins vegna yfirstandandi Covid-19 heimsfaraldurs, frá 19. mars 2020, er fyrirtæki heimilt að taka við samanlagt allt að 100 millj. kr. greiðslu í formi ferðagjafa. Fyrirtæki sem var í rekstrarerfiðleikum 31. desember 2019 í skilningi hópundanþágureglugerðar (ESB) nr. 651/2014 getur að hámarki tekið við samanlagt 25 millj. kr. greiðslu í formi ferðagjafa.

Fyrirtæki telst hafa verið í fjárhagserfiðleikum á þeim tímapunkti ef a.m.k. eitt af eftirfarandi skilyrðum er uppfyllt, samanber skilyrði í tímabundnum reglum um ríkisaðstoð til stuðnings hagkerfisins vegna yfirstandandi heimsfaraldurs, frá 19. mars 2020:

1. Um er að ræða félag með takmarkaðri ábyrgð og bókfært eigið fé þess, samkvæmt viðurkenndum reikningsskilaaðferðum, er orðið lægra en nemur helmingi innborgaðs hlutafjár að meðtöldum yfirverðsreikningi.

2. Um er að ræða félag þar sem a.m.k. einn aðili ber ótakmarkaða ábyrgð á skuldum félagsins og bókfært eigið fé þess, samkvæmt viðurkenndum reikningsskilaaðferðum, er orðið lægra en nemur helmingi innborgaðs hlutafjár að meðtöldum yfirverðsreikningi.

3. Um er að ræða fyrirtæki sem sætir gjaldþrotameðferð eða uppfyllir skilyrði um að vera tekið til gjaldþrotameðferðar að beiðni kröfuhafa.

4. Um er að ræða fyrirtæki sem hefur fengið björgunaraðstoð í skilningi leiðbeinandi reglna Eftirlitsstofnunar EFTA (ESA) um björgun og endurskipulagningu fyrirtækja, og hefur enn ekki endurgreitt lánið eða aflétt ábyrgðinni eða hefur fengið aðstoð til endurskipulagningar og er því enn bundið af samþykktri áætlun um endurskipulagningu.

5. Eftirtalin skilyrði hafa átt við síðustu tvö reikningsár: a) hlutfall milli bókfærðra skulda fyrirtækisins og eigin fjár hefur verið hærra en 7,5 og b) hagnaður fyrir afskriftir og vexti (EBITDA) nemur lægri fjárhæð en nettófjármagnskostnaður ársins.

Skilyrði (1) og (2) eiga ekki við um fyrirtæki sem er lítið eða meðalstórt, hafi starfsemi þess staðið yfir í þrjú ár eða skemur.

Skilyrði (5) á ekki við um fyrirtæki sem er lítið eða meðalstórt.

Um skilgreiningu á litlum og meðalstórum fyrirtækjum fer eftir lögum um ársreikninga nr. 3/2006.

Fyrirtæki geta beintengt Ferðagjöfina við kassa- og/eða bókunarkerfi. Með beintengingu má nýta Ferðagjöfina sem gjafakóða þegar bókað er á vef.

Nánari upplýsingar varðandi beintengingu má finna hjá info@yay.is.

Fjársýsla Ríkisins sér um að greiðslur til fyrirtækja í upphafi hvers mánaðar.

1. Ferðaþjónustufyrirtæki fá mánaðarlega sendar söluskýrslu um nýtingu á Ferðagjöfinni.

2. Ferðaþjónustufyrirtæki frá greitt inn á valinn reikning skv. söluskýrslu.

Öll fyrirtæki sem skrá sig til þátttöku í Ferðagjöfinni fá aðgang að vefsvæði til að geta fylgst með innlausnum á Ferðagjöfinni. Um leið og gjöf er nýtt kemur hún inn á notkunarskýrslu fyrirtækis.

1. Hver sá sem hyggst starfa sem ferðaskrifstofa eða ferðasali dagsferða skv. III. kafla laga um Ferðamálastofu, nr. 96/2018, skal hafa til þess leyfi Ferðamálastofu. Sjá nánar hér: www.ferdamalastofa.is/is/leyfi-og-loggjof/ferdasali-dagsferda/unsoknarferlill 

2. Sá sem hyggst stunda starfsemi sem fellur undir gistiflokka II-IV og veitingastaðaflokka II og III skv. 7. gr. laga um veitingastaði, gististaði og skemmtanahald, nr. 85/2007 skal hafa til þess rekstrarleyfi útgefið af sýslumönnum. Sjá nánar hér: www.syslumenn.is/thjonusta/leyfi-og-loggildingar/veitingaleyfi 

3. Sá sem hyggst stunda starfsemi sem fellur undir veitingastaðaflokk I, sbr. 3. mgr. 4. gr. laga um veitingastaði, gististaði og skemmtanahald, nr. 85/2007 skal hafa til þess gilt starfsleyfi frá viðeigandi heilbrigðisnefnd. Hafið samband við heilbrigðisnefnd í hverju sveitarfélagi varðandi starfsleyfi. 

4. Ökutækjaleigur skulu hafa gilt starfsleyfi frá Samgöngustofu skv. 1. mgr. 3. gr. laga um leigu skráningarskyldra ökutækja, nr. 65/2015. Sjá nánar hér: www.samgongustofa.is/umferd/leyfi-og-eftirlit

https://youtu.be/q0hfSHLklKk

https://youtu.be/tkff3XZ6KXE