Mennta- og barnamálaráðuneytið óskar eftir umsögnum um drög að þriðju aðgerðaáætlun menntastefnu til 2030. Í drögunum eru um þrjátíu aðgerðir sem miða að því að hvert barn nái betri árangri í námi og búi við meiri farsæld.

Áætlunin tekur til áranna 2027–2030. Með henni er byggt á því sem vel er gert og lögð áhersla á að styrkja lykilstoðir menntakerfisins.

Áhersluatriðin eru sex:

1. Kennarar í fremstu röð – aukin gæði kennslu.

2. Stórsókn í útgáfu námsgagna – fjölbreytt og vönduð námsgögn.

3. Stuðningur strax – öruggt og inngildandi skólasamfélag.

4. Alla leið – ekkert ungmenni týnist á leiðinni úr grunnskóla í framhaldsskóla og út í lífið.

5. Skref fram á veginn – raunvísindi, tækni, verkfræði og stærðfræði (STEM), gervigreind og hæfni fyrir samfélag framtíðar.

6. Menntastefna til framtíðar.

Í drögunum er meðal annars lagt til að efla starfsþróun kennara, vinna langtímaáætlun um læsi, auka útgáfu fjölbreyttra námsgagna og styrkja stuðning við nemendur og inngildingu. Einnig er lögð áhersla á aukna þátttöku foreldra og samræmd landsviðmið um skólasókn.

Lagt er upp með skýr og mælanleg markmið og mælikvarða til að fylgjast með framvindu og árangri aðgerðanna.

Áætlunin er liður í innleiðingu menntastefnu til 2030, sem Alþingi samþykkti með þingsályktun 24. mars 2021. Áformað er að mennta- og barnamálaráðherra leggi áætlunina fram á Alþingi sem tillögu til þingsályktunar.

Börn, foreldrar, kennarar, skólastjórnendur, annað fagfólk og aðrir áhugasamir eru hvattir til að kynna sér drögin og senda inn umsögn.